لما تيجى تعمل مكالمة وانت عميل فى شركة اتصالات مصر هتلاقى الشبكة واقعة ياما الرقم مبيجمعش ياتلاقى حد دخل جوه المكالمة اوتلاقى نفسك كانك غرقان فى البحر واصوات غريبة وتليفونك ياما يلقط شبكة بالصدفة وتقوم تصلى ركعتين ياما يجيلك رسالة ان فيه رقم حاول يكلمك.
ويا سلام بقى لما تكلم خدمة العملاء وتقولهم ان الشبكة وحشة يقولك تقدم شكوى ونبحثها عن طريق قسم الشبكات وتلاقى حد يكلمك بعدها يقولك معلش اصل عندنا مشكلة فى استيراد قطع غيار الابراج الخاصة بالشبكات وسبحان الله فى نفس الوقت تلاقى اعلان لياسمين صبرى واحمد امين بيقولها “ردى عليا يا ياسمين كل الابراج لاقطين” ولا تلاقى شيرين رضا وخالد النبوى عاملين اعلان بيقولك “ياتبقى اميرالد ياتبقى مش اميرالد” ولا تلاقى اعلان لاحمد حلمى ولا عمر كمال وفرقة مهرجانات.
الشركة بتعتمد على الدعاية وتدفع فلوس العملاء فى الاعلانات على الفنانين والمطربين ومش مهم الجودة ولا الحرص على تقديم الخدمة اللى كل ما عميل يطلبها يقوله معلش يافندم ” السيستم واقع”
حصل مواقف قدامى كتير فى رحلة لفرع اتصالات مصر القديمة اللى السيستم واقع فيه بقالو 4 ايام ولو عايز تبدل شريحة اوتغير نظام او تعمل اى خدمة يقولك السيستم واقع يا فندم.. يبقى ايه الفرق بين فرع الشركة والسنترال اللى فاتح فى اى شارع لان الاتنين بيقدمو خدمة واحدة الا وهى شحن رصيد فقط اوبيع خطوط وحتى لو طلبت من الفرع كارت اتصالات يقولك مفيش.. فيه تحويل رصيد بس.
انا عايز اقول لحضرتك ان السنترال العادى او مركز الاتصالات اللى فاتح فى اى منطقة او سوبر ماركت حتى بقى بيقدم خدمة اعلى من الفرع نفسه بيدفع فواتير ويبيع كروت ويشحن رصيد وفواتير غاز وكهرباء ومياه وشحن كروت كهرباء.. الخ
لك ان تتخيل انى علشان احول نظام الخط بتاعى اقعد حوالى ساعتين جوة الفرع.. فين الرقابة وفين جهاز تنظيم الاتصالات من المهازل اللى بتحصل فى شركة اتصالات مصر.. لا والادهى من كدة ان وانا واقف فى الفرع وبيبعتلى رصيد جربت اعمل الباقة جاتلى رسالة ان رصيدك غير كافى ولما بسأل موظف الفرع بيقوللى اتصل بخدمة العملاء مع ان الرصيد كافى وهو اللى لسة محولهولى.
انا بقترح ان الشركة تستفاد من الفروع اللى مفتوحة على مستوى الجمهورية وتحولهم سوبر ماركت اهو على الاقل هيقدمو خدمات عن اللى مش بيقدموها دلوقتى ومجرد شبكة فروع وموظفين وعمال وكهرباء شغالة على الفاضى.
نداء واستغاثة الى الجهاز القومى لتنظيم الاتصالات
التعليقات مغلقة.